ភ្នំពេញ៖ តារាចម្រៀងរ៉េបល្បីឈ្មោះម្នាក់នៅកម្ពុជា លោក ងួន ចាន់ដេវីត ហៅថា ជី ដេវីត បានបន្តការសិក្សាដោយចាប់យកថ្នាក់វិជ្ជាភាសាបាលីសំស្ក្រឹត នៅពុទ្ធិកវិទ្យាល័យព្រះសុរាម្រឹត ខណៈលោកមានសេចក្តីជ្រះថ្លាក្នុងពុទ្ធសាសនាធ្លាប់បានបួសកន្លងមកផងដែរ។
យោងតាមទំព័រផ្លូវការរបស់ទីចាត់ការកិច្ចការបាលី នៃពុទ្ធិកវិទ្យាល័យព្រះសុរាម្រឹត បានបង្ហោះសារ អមជាមួយរូបភាពលើបណ្តាញសង្គម ឱ្យដឹងថា ថ្នាក់ភាសាសំស្ក្រឹតមូលដ្ឋាន នៃពុទ្ធិកវិទ្យាល័យព្រះសុរាម្រឹត ស្វាគមន៍សិស្សថ្មី ដែលជាលោក ជី ដេវីត និង បញ្ចាក់ថា នេះជាគំរូដ៏ល្អសម្រាប់យុវជន។
ក្នុងសារបញ្ជាក់ថា៖ «សូមស្វាគមន៍សិស្សថ្មី ថ្នាក់ភាសាសំស្ក្រឹតមូលដ្ឋាន បង្រៀនដោយព្រះបាលិកោសល បណ្ឌិត សែម ឈុនលី ក្នុងវគ្គបណ្ដុះបណ្តាលជំនាញភាសាបាលី ទីចាត់ការកិច្ចការបាលី នៃពុទ្ធិកវិទ្យាល័យព្រះសុរាម្រឹត។ នេះជាគំរូដ៏ល្អសម្រាប់យុវជនយើង»។
លោក ជី ដេវីត មួយរយៈក្រោយនេះបានបង្កើតបទចម្រៀងជាបន្តបន្ទាប់ទាំងទងនឹងប្រវត្តិសាស្រ្តរបស់កម្ពុជា គួបផ្សំនឹងការបង្ហាញជាភាសាសំស្រ្កឹតផងដែរ។
គួរឱ្យដឹងដែរថា លោក ជី ដេវីត ធ្លាប់បានសាងផ្នួសបួសជាសង្ឃ ក្នុងរយៈពេលខ្លីនៅវត្តល្អាងកង្កែប ក្នុងខេត្តបាត់ដំបង កាលពីខែកក្កដា ឆ្នាំ២០២០ ខណៈក្នុងខែកក្កដា ឆ្នាំ២០២៣ នេះលោកបានចាប់យកការសិក្សាវិជ្ជាភាសាបាលីសំស្ក្រឹតវិញម្តង ដែលទទួលបានការកោតសសើរជាហូរហែរពីអ្នកគាំទ្រ៕
